Կրծքի չափերի հետ կապված անհանգստությունը տարածված է շատ երիտասարդ աղջիկների մոտ: Այս անհանգստության առաջացման հիմքում, թերևս, ամենամեծ դերը խաղում է զանգվածային լրատվամիջոցների կողմից սեքսուալ համարվող կնոջ աղավաղված պատկերի ստեղծումը: Ֆիլմերի, անգամ մուլտֆիլմերի հերոսուհիներն այսօր պատկերվում են բարձրահասակ, մեծ կրծքագեղձերով, կլորիկ հետույքով, սլացիկ ոտքերով, լցրած շուրթերով, երկար թարթիչներով: Ամսագրերում, գովազդային վահանակներում պատկերված կանանց, աստղային համարվող դերասանուհիների և երգչուհիների արտաքինն այսօր թելադրված և ձևավորված է մեկ սկզբունքով՝ համապատասխանել էրոտիկ-սեքսուալ համարվող կնոջ կերպարին: Թե ո՞ւմ կողմից է այդ կերպարը սեքսուալ համարվում և ովքե՞ր են այդ կերպարի մասսայականացման հեղինակները՝ հարցի մյուս կողմն է: Թողնելով այդ քննարկումը մեկ այլ առիթի, այս գրառմամբ ձեր ուշադրությանն եմ արժանացնում մեծ կրծքագեղձերի ու դրանց ֆետիշացմանը վերաբերող մի քանի խնդիրներ:
Սկսենք նրանից, որ կրծքագեղձերի զարգացումը սկսվում է սեռահասունացման շրջանում ձվարանների կողմից արտադրվող էստրոգենային հորմոնների ազդեցությամբ: Կրծքագեղձը կազմված է երկու տեսակի հյուսվածքից՝ գեղձային և շարակցական: Երկու տիպի հյուսվածքներն էլ էստրոգեն կախյալ են: Գեղձային հյուսվածքի ձևավորումը ընթանում և իր ավարտին է հասնում սեռահասունացման տարիներին: Մարդը միակ կենսաբանական տեսակն է ում կրծքագեղձերի հասունացումն ավարտվում է սեռահասունացման շրջանում, այլ ոչ թե առաջին հղիության ժամանակ, ինչպես այլ կաթնասունների մոտ է: Կրծքագեղձերի չափսը և տեսքը, որը հիմնականում կախված է գեղձային բլթակների քանակից և դասավորությունից, գենետիկորեն պայմանավորված է ու կապ ունի սննդակարգի հետ: Կրծքագեղձերի չափսի որոշ մեծացում բնականոն կարող է տեղի ունենալ սեռահասունացումից հետո ճարպային հյուսվածքի հաշվին, որը լցնում է միջբլթակային տարածքները:
Մեծ կրծքագեղձեր ունենալու կպչուն փափագը հետապնդում է հատկապես երիտասարդ աղջիկներին, ովքեր դեռ ինքնահաստատման մեջ են: Նրանք զոհ են դառնում տղամարդկանց աշխարհում ստեղծված կանացի սեքսուալ-էրոտիկ կերպարի ճնշող թելադրանքին: Այս միտումն, այնուամենայնիվ, զերծ չէ նաև գիտական հիմքից (թեև պարզ չէ, թե հատկապես ում կողմից են ֆինանսավորովւմ այս հետազոտությունները), քանի որ տղամարդկանց սեքսուալությանը բնորոշ է ֆետիշացման հատկանիշը: Տղամարդկանց ուշադրությունը գրավելու նպատակով կանայք բնազդաբար օգտագործում են նրանց այս հատկանիշը` ի ցույց դնելով իրենց մարմնի այս կամ այն առավել աչքի ընկնող մասը: Այսպես օրինակ` այն տղամարդը, ում համար կնոջ սեքսուալությունը նեղացվել ու տեղայնացվել է կրծքի չափի մեջ, հավանաբար կընտրի հենց մեծ կրծքեր ունեցող սեռական զուգընկերուհի, էլ չեմ ասում՝ հարսնացու: Սա կբարդույթավորի բոլոր այն աղջիկներին, ովքեր հավակնում էին այդ տղամարդու ուշադրությանը:
Սակայն պակաս ճնշված հոգեվիճակում չի հայտնվում նաև «մեծ կրծքերով ընտրյալը»: Վերջինս մեծ պատրաստակամությամբ ցուցադրում է իր կուրծքը, գոհանում այդ ցուցադրության թողած տպավորիչ արդյունքներով և ժամանակից շուտ տոնում թվացյալ հաղթանակը: Իսկ ինչո՞ւ թվացյալ, քանի որ կամաց-կամաց նման կնոջ մոտ զարգանում է այն վտանգավոր համոզումը, որ իր սեքսուալության հիմնական զենքը կուրծքն է, քանի որ հենց դրա միջոցով է նա արժանանում հակառակ սեռի ուշադրությանը: Այսպիսի մտածելակերպով կինը վաղ թե ուշ հայտնվում է իր այդ համոզման թակարդում: Իսկ վտանգը՝ սեփական սեքսուալ գրավչությունը տղամարդու ճաշակին հարմարեցնելու մեջ է, դրա հայելային արտապատկեր դառնալը: Կորցնելով սեփական սեքսուալ ինքնության բազմաբովանդակ ու բազմաշերտ իրականությունը՝ կինը նույնպես ֆիքսվում է մարմնի մի հատվածի վրա ու սահմանափակում իր ազատությունը՝ կախվածության մեջ ընկնելով կրծքի չափից: Սա ուղիղ ճանապարհ է դեպի ցածր ինքնագնահատական, որով մեծ կուրծք ունեցող աղջիկները պակաս չեն տառապում, ինչպես և փոքր կուրծք ունեցողները:
Երբ կինը սկսում է մտածել, որ ինքը ցանկալի է տղամարդուն իր մարմնի որևէ հատվածի պատճառով միայն, նա դատապարտում է իրեն մշտնջենական տագնապի և դեպրեսիայի: Եթե սկզբում նա մեծամտորեն իրեն համարում էր մրցակցությունից դուրս, ապա մի որոշ ժամանակ անց Նա սկսում է համեմատվել մյուս աղջիկների հետ, ովքեր ավելի մեծ կուրծք ունեն և այդ համեմատության մեջ պարտություն է կրում: Կանացի ինքնագնահատականն իջնում է: Էլ չեմ ասում, որ վախ է առաջանում, որ զուգընկերը մի օր կհոգնի իրենից և կփոխարինի իրեն ավելի մեծ կուրծք ունեցող աղջկա հետ: Սովորաբար նմանատիպ վախերն իրականանում են և վերջնականորեն զրոյացնում կանացի ինքնագնահատականը: Իսկապես, ինչպես ցույց է տալիս մեր կլինիկական փորձը, ժամանակին մեծ կրծքերի սիրահար տղամարդիկ տարիներ անց դադարում են մեծ կրծքերի ֆետիշ լինել և հակառակը՝ հիմա էլ դառնում են փոքր կրծքերի սիրահար:
Չպետք է մոռանալ, որ իրականում սեքսուալությունը բազմատարր ու բազմակողմանի է, որը ոչ մի դեպքում չի սահմանափակվում մարմնի առանձին մասերի չափերով կամ ձևով: Մարդու սեքսուալության կարևոր բաղադրատարրերից են` միտքը, փոխըմբռնումը, էրոտիզմը, սեռազգայունությունը, երևակայությունը, սեռադերային փոխլրացնող վարքը, զուգընկերոջը ներդաշնակելու ունակությունը, սեռահուզային վերապրումների կարողությունը: Ուստի, եթե զույգըն ուզում է լիարժեք զարգացնել սեքսուալության լայն հնարավորությունները, նա պետք է համակողմանի պատկերացում ունենա սեքսուալության և, հատկապես, կնոջ սեքսուալության վերաբերյալ: Երբևէ որևէ այլ կնոջ հետ համեմատվել չի կարելի, հիշեք, համեմատությունը հղի է ինքնագնահատականի իջեցման, սեռական սառնության առաջացման և սեռական ներդաշնակության խափանման վտանգներով:
